||معلومات مهمه بخصوص لزوجة الزيت ومعنى w بين الرقمين

معلومات مهمه بخصوص لزوجة الزيت ومعنى w بين الرقمين

لاحظت من فترة انا وكثير من الاعضاء يسألون عن احسن زيت و تلقى ناس تذم بزيت معين و ناس تمدحه و الأهم من هذا انه ناس راحت عليهم مكاين سياراتهم و خسروا فلوسهم بسبب شغلات بسيطة ما انتبهوا فيها و استهانوا فيها .. و منها زيت المكينة

من باب الاستفادة .. قعدت اقرا عن سالفة الزيوت و شالفرق بينها و بعطيكم زبده كتب و ابحاث …

كلنا ندري ان الزيت وظيفته يخفف الاحتكاك بين قطع المكينة .. يصير 100 طبقات 😀

طيب وين المشكلة ؟

الزيت له لزوجة و كثافة معينة .. يعني بدرجة حرارة عالية تخف لزوجته و يصبح خفيف مثل الماء و اذا كان الجو بارد يصير ثقيل خاصة بالدول اللي يكون فيها ثلج ..

هنا المشكلة

اخطر شي على المكينة انها تشتغل من غير زيت .. و هذا يصير إذا المكينة مافيها زيت أو أن الزيت ما يروح للمكينة و السبب طرمبة الزيت تعبانة ( و هذا نادر ) أو أن الطرمبة تكون اوتمام بس المشكلة بالزيت <– و هذا مربط الفرس مثل ما يقولون

الزيوت أنواع .. في يسمونه احادي الدرجة و في متعدد الدرجات

الاحادي هذا نادر و له استخدامات غير مكاين السيارات .. هذا يكون لزج في درجة حرارة معينة و عقبها ماله فايده ..

متعدد الدرجات هذا اللي نستخدمه و اللي ندور عليه و دائما تكون ارقامه بهالطريقه

20W50
10W40
10W30
5W30

W يعني winter فصل الشتا .. و الارقام ؟؟

كثير ناس و انا واحد منهم كنت احسب ان لها علاقة بدرجة الحرارة علشان كذا دائما ندور أعلى رقم و هذا خطأ

الرقم اللي قبل W هذا مؤشر للزوجة و كثافة الزيت لما يكون بارد ، و الرقم اللي بعد W يعني مقدار التمدد للزيت لما يكون حار

مثلا زيت 10W40 لما يكون حار يتمدد 4 اضعاف لما يكون بارد … علشان كذا يقولك لا تحط زيت زيادة ولا المكينة تروح عليك و السيارة تحترق لا سمح الله و السبب ان الزيت تمدد و طلع برى المكينة.. 

هذي شغلة .. الشغلة الثانية و اللي تخرب المكينة و الناس ما تنتبه لهالنقطة .. ان طرمبة الزيت مصممة على لزوجة معينة … و حتى الفراغات ( اللي الزيت يدخل فيها )بين السلندر و البلوك يختلف من مكينة لمكينة …

فأكبر غلط ان تحط زيت من كيفك أو ان سيارتك الأولية كنت تحط فيها زيت معين و مشى وياك اوكي و بتحط نفسه بسيارتك الجديدة ..

فرضا طرمبة سيارتك مصممه لزيت لزوجته 10w30 و حطيت زيت ثقيل مثلا 20w50 راح تشوف ان لما تشغل السيارة الصبح تكون ثقيله و تسمع صوت التكايات و يبيلها فترة على بال ما تسخن … و اذا طلعت من غير ما تسخنها تشوف السيارة تنتع و القير تبديلته ثقيله..

و بعد فترة تشوف الطرمبة ودعت و المكينة تالي …

لو تلاحظون السيارات القديمه تحتاج مده كي تسخن ايام الشتاء .. عكس السيارات الجديدة ا خلال ثواني تشوف RPM نزل بسرعه و السيارة جاهزه و السبب ان اغلبها تستخدم زيت خفيف بسرعه يدور بأجزاء المكينة ..

احسن مثال لكلامي : الجموس القديمه كان المصنع يستخدمون 20w50 و الناس مشت عليه .. من موديلات 2000 و فوق المصنع بدء يوصي بالزيت الخفيف و يكتب هالشغلة بكتالوج السيارة و كاتبين لا تستخدمون 20w50.. بس المشكله ان الناس ما تقرا … و مااشيه تحط الزيت الثقيل و بعد فترة تشتكي من صوت التكايات و ضغط الزيت نازل و السبب الزيت اللي يستخدمونه !!

فأحسن حل نشوف اللزوجة اللي يوصي فيها المصنع و اذا مو متوفرة يحطون لك لزوجة بديله و تالي جرب بالماركات على راحتك بس تكون اللزوجة نفسها ..

منقول بتصريف

بواسطة | 2018-03-28T00:51:43+03:00 مارس 28th, 2018|قسم الميكانيكا|0 تعليقات

اترك رد